• Yampano wababariwe n'umugore yasabiwe gufungwa iminsi 30 y’agateganyo

Ubushinjacyaha bwasabye Urukiko rw’Ibanze rwa Kicukiro ko umuhanzi Uworizagwira Florien uzwi nka Yampano afungwa by’agateganyo iminsi 30, mu gihe iperereza ku byaha akurikiranyweho rigikomeje.

Ibi byatangajwe kuri uyu wa Kabiri, tariki ya 02 Kamena 2026, ubwo urubanza rwe rwaburanishwaga.

Ibyaha aregwa n’uko Ubushinjacyaha bubisobanura

Ubushinjacyaha buvuga ko bushingira ku kirego cyatanzwe n’umugore babanaga ariko batarasezerana, watanze ikirego ku wa 11 Gicurasi 2025. 

Buvuga ko Yampano yagiye amukorera ihohotera rishingiye ku mubiri n’amagambo, harimo kumukubita no kumutera ubwoba ko azamwica aramutse amureze mu nzego z’ubutabera.

Uregwa akurikiranyweho ibyaha bitandatu birimo:

• Gukubita no gukomeretsa ku bushake

• Gukoresha ibikangisho

• Kwangiza ibintu by’undi;

• Ubwinjiracyaha mu cyaha cy’ubwicanyi;

• Kunywa ibiyobyabwenge by’urumogi;

• Gufungirana umuntu mu buryo bunyuranyije n’amategeko

Ibimenyetso byagaragajwe mu rukiko

Ubushinjacyaha bwasobanuye ko hari abatangabuhamya bemeza ko Yampano yakubitaga umugore we. Hanagaragajwe raporo y’inzego z’ibanze ivuga ko yigeze kumushikuza telefoni akayikubita ku rukuta ikameneka.

Ku cyaha cy’ubwinjiracyaha mu bwicanyi, hagaragajwe ubuhamya buvuga ko mu gihe bari mu modoka bashyamiranye, umugore yasohotse agiye gufata moto, maze Yampano amugonga inyuma we n’umumotari bagwa hasi. Umumotari na we yemeje ko iyo mpanuka yabaye, hakaba hari na raporo y’uko Yampano yatanze amafaranga nyuma yaho.

Ibyo uregwa yemeye n’uko yisobanura

Yampano yemeye ko hari amakimbirane yabaga mu rugo rwe, avuga ko yatangiye gukoresha ibiyobyabwenge akiri mu mashuri yisumbuye ariko ko yari atangiye kubireka.

Yemeye kandi ko umugore we yigeze gukomereka mu gihe cy’impaka, ariko avuga ko atabigambiriye, anavuga ko yamujyanye kwa muganga nyuma yaho.

Ku bijyanye n’ibiyobyabwenge, yagaragaje ko yari afite urugero ruri hejuru y’urwa bisanzwe mu mubiri, ariko avuga ko yari yaramaze gutangira urugendo rwo kubireka ndetse akaba yaranagiye kwivuza mu kigo cyita ku bafite ibibazo by’inyongeramusaruro n’ubuzima bwo mu mutwe.

Umwunganizi wa Yampano yavuze ko hari inyandiko umugore we yanditse amusabira imbabazi, avuga ko bagomba kongera kubana. Yagaragaje ko hari ibyaha bimwe umukiriya we akwiye gukurikiranwaho, ariko hari ibindi asanga nta bimenyetso bihagije bifite.

Uruhande rw’Ubushinjacyaha n’Urukiko

Ubushinjacyaha bwavuze ko imbabazi z’umugore zidakuraho ibyaha bikurikiranweho, cyane cyane ibyaha bifite ishingiro mu mategeko aho uregwa atashingirwaho ku mbabazi z’umuntu umwe gusa.

Umucamanza yibukije ko nubwo hari imbabazi zatanzwe, hari ibyaha bidashingira ku bushake bw’umuntu umwe gusa mu kubikurikirana.

Yampano yasabye kurekurwa akaburana ari hanze, avuga ko iminsi amaze afunzwe yamwigishije byinshi kandi ko atazongera gukora ibyo ashinjwa.

Urukiko rwatangaje ko icyemezo ku busabe bw’Ubushinjacyaha kizatangazwa ku wa Gatanu, tariki ya 05 Kamena 2026 Saa cyenda z'amanywa.

Like This Post?

• Share On:

Related Posts

---