• MTN MoMo na BPR Bank Rwanda batangije ‘MoFaya’, serivisi nshya y’inguzanyo n’ubwizigame

MTN MoMo na BPR Bank Rwanda batangije ‘MoFaya’, serivisi nshya y’inguzanyo n’ubwizigame izafasha abakiliya kubona kugeza kuri miliyoni 2 Frw

Mu rwego rwo gukomeza korohereza Abanyarwanda kubona serivisi z’imari hifashishijwe ikoranabuhanga, MTN Mobile Money (MoMo Rwanda) ku bufatanye na BPR Bank Rwanda Plc, batangije ku mugaragaro MoFaya, serivisi nshya ihuza inguzanyo n’ubwizigame ikorerwa kuri telefoni igendanwa.

Iyi serivisi ije mu gihe u Rwanda rukomeje gushyira imbaraga mu guteza imbere ubukungu bushingiye ku ikoranabuhanga no kongera umubare w’abaturage bagerwaho na serivisi z’imari. MoFaya itegerejweho korohereza abakoresha Mobile Money kubona inguzanyo no kwizigamira batiriwe basura ishami rya banki cyangwa buzuza impapuro nyinshi.

MoFaya ni urubuga rw’ikoranabuhanga rwakozwe ku bufatanye bwa MTN MoMo na BPR Bank Rwanda, rugamije gutanga serivisi z’inguzanyo n’ubwizigame mu buryo bworoshye kandi bwihuse.

Abakiliya ba MTN MoMo bujuje ibisabwa bazashobora gusaba inguzanyo, kuyihabwa no kuyishyura bakoresheje telefoni zabo, ndetse banizigamire amafaranga aturutse kuri konti yabo ya Mobile Money.

Ibi bivuze ko umuntu atazongera gusabwa kujya ku ishami rya banki kugira ngo abone izi serivisi, ahubwo azajya azikoresha aho ari hose n’igihe cyose.

Kimwe mu by’ingenzi byatangajwe ni uko abakiliya bujuje ibisabwa bazashobora kubona inguzanyo igera kuri miliyoni ebyiri z’amafaranga y’u Rwanda (2,000,000 Frw).

Ingano y’inguzanyo umuntu ashobora guhabwa izashingira ku isesengura rya konti ye, amateka y’imikoreshereze ya Mobile Money ndetse n’ubushobozi bwe bwo kwishyura.

Ibi bizafasha cyane abantu bakenera amafaranga yihuse yo gukemura ibibazo byihutirwa, kongera igishoro cyangwa gukomeza ibikorwa byabo by’ubucuruzi.

Uretse inguzanyo, MoFaya inatanga amahirwe yo kwizigamira amafaranga aturutse kuri konti ya Mobile Money.

Abakiliya bazajya bohereza amafaranga muri konti y’ubwizigame bitabasabye kujya kuri banki, bikazabafasha gutoza umuco wo kuzigama no guteganyiriza ejo hazaza.

Iyi gahunda ishobora gufasha abaturage benshi batari basanzwe bakoresha konti za banki kubona uburyo bworoshye bwo kubika amafaranga yabo mu buryo bwizewe.

Umuyobozi Mukuru wa BPR Bank Rwanda PLC, Patience Mutesi yavuze batangije iyi serivisi bagamije korohereza abantu kugera kuri serivisi z’imari.

Ati “Mu ntego dusanzwe dufite nka BPR Bank Rwanda PLC ni uko dushyira imbere ibijyanye no gutuma serivisi z’imari zigera kuri bose rero ni yo mpamvu twahisemo gukorana na MoMo Rwanda Ltd kuko ifite abakiliya benshi barenga miliyoni esheshatu, iyo wongeyeho abacu urumva ko umubare w’Abanyarwanda tuba tugezeho baba ari benshi cyane.”

Umuyobozi Mukuru wa Mobile Money Rwanda Ltd, Chantal U. Kagame, yavuze ko batangije iyi serivisi mu rwego rwo gufasha abantu bakoresha Mobile Money kuzajya babona amafaranga mu buryo bworoshye kugira ngo bakemure ibibazo bafite bitandukanye.

Ati “Mbere y’uko tuzana iyi serivisi twabanje kumva ibyo abakiliya bacu bakeneye mu buzima bwabo bwa buri munsi kuko hari igihe ashobora gukenera amafaranga yo gukemura ibibazo runaka, rero binyuze muri iyi serivisi umuntu uzajya uyakenera azajya yifashisha MoFaya mu gukemura bya bibazo cyangwa mu gushora mu bikorwa bitandukanye byamufasha kwiteza imbere.”

Yakomeje agira ati “MoFaya izajya ifasha abakiliya bacu kwiguriza amafaranga ndetse no kuzigamira ahazaza mu buryo bworoshye bifashishije telefone yabo igihe icyo ari cyo cyose.”

U Rwanda rumaze gukataza mu bijyanye no kugeza serivisi z’imari kuri bose dore ko ubu Abanyarwanda bagerwaho na zo ari 96% barimo 92% bazigeraho binyuze muri banki cyangwa Mobile Money.

Serivisi zayo zizajya zitangirwa kuri telefoni hifashishijwe kode *182*5*6#, aho umukiliya azakurikiza amabwiriza agaragara kuri telefoni ye kugira ngo asabe inguzanyo cyangwa atangire kwizigamira.

Ibi bizagabanya igihe abantu bata mu ngendo zo kujya kuri banki no gutegereza serivisi, bityo babone ibisubizo byihuse.

Abasesenguzi mu rwego rw’imari bavuga ko serivisi nk’iyi ishobora kugira uruhare rukomeye mu guteza imbere ubukungu bw’abaturage.

Abacuruzi bato n’abaciriritse bazabona uburyo bwihuse bwo kubona amafaranga yo kongera ibikorwa byabo, mu gihe n’abandi bakiliya bazagira uburyo bworoshye bwo kwizigamira no gucunga neza umutungo wabo.

Ibi kandi bishobora kongera umubare w’Abanyarwanda bakoresha serivisi z’imari z’ikoranabuhanga, bikajyana n’icyerekezo cy’igihugu cyo kubaka ubukungu butagira amafaranga afatika (cashless economy).

Ubufatanye hagati ya MTN MoMo na BPR Bank Rwanda bugaragaza ubushake bw’izi nzego bwo gukomeza guhanga udushya mu rwego rw’imari.

BPR Bank Rwanda ni imwe muri banki nini mu gihugu, mu gihe MTN MoMo ari imwe muri serivisi zikoreshwa cyane mu kohereza no kwakira amafaranga, kwishyura serivisi zitandukanye ndetse no gukora ubucuruzi hifashishijwe telefoni.

Izi sosiyete zombi zemeza ko MoFaya ari imwe mu serivisi zizafasha gukomeza kongera ubwisungane mu by’imari no korohereza abakiliya kubona ibisubizo byihuse.

Abakiliya ba MTN MoMo bifuza gukoresha iyi serivisi basabwa guhamagara *182*5*6# kuri telefoni zabo, bagakurikiza amabwiriza agaragara kuri ecran.

Abujuje ibisabwa bazashobora gusaba inguzanyo, kureba amafaranga bemerewe kugurizwa, gutangira kwizigamira no gukurikirana serivisi zabo zose bakoresheje telefoni gusa.

 

Like This Post?

• Share On:

Related Posts

---